மத்திய கிழக்கு பிராந்தியத்தில் நிலவும் போர் பதற்றமான சூழலைத் தொடர்ந்து, இலங்கையில் எரிபொருள் தட்டுப்பாடு ஏற்படக்கூடும் என்ற அச்சத்தில் பொதுமக்கள் தேவையற்ற முறையில் எரிபொருளைச் சேமிப்பதைத் தவிர்க்குமாறு பொலிஸ் தலைமையகம் கடும் எச்சரிக்கை விடுத்துள்ளது.
நாட்டில் போதியளவு எரிபொருள் கையிருப்பில் உள்ளதாக இலங்கை பெட்ரோலியக் கூட்டுத்தாபனம் உறுதியளித்துள்ள நிலையில், வதந்திகளை நம்பி எரிபொருளைப் பதுக்குபவர்களுக்கு எதிராக கடும் சட்ட நடவடிக்கை எடுக்கப்படும் என பொலிஸ் ஊடகப் பிரிவு தெரிவித்துள்ளது.
இந்த நிலையில் கலன்கள், போத்தல்கள் அல்லது ஏனைய கொள்கலன்களில் எரிபொருள் விநியோகிப்பதைத் தவிர்க்குமாறு அனைத்து எரிபொருள் நிலையங்களுக்கும் ஏற்கனவே உத்தரவிடப்பட்டுள்ள நிலையில் மட்டக்களப்பு மாவட்டத்தில் எரிபொருள் நிலையங்களில் கொள்கலன் மற்றும் போத்தல்களில் எரிபொருட்கள் வழங்கப்படுவதை காணமுடிகின்றது.
இவ்வாறான கடும் கட்டுப்பாடுகளுக்கு மத்தியிலும், இன்று (02.03.2026) காலை முதல் மட்டக்களப்பு மட்டக்களப்பில் எரிபொருள் நிரப்பும் நிலையத்தில் பொதுமக்களுக்கு போத்தல்கள் மற்றும் கலன்களில் தாராளமாக எரிபொருள் விநியோகிக்கப்படுவதாகக் குற்றச்சாட்டுகள் எழுந்துள்ளன.
சிலர் இவ்வாறு கலன்களில் பெற்றுக்கொள்ளும் எரிபொருளைத் தமது வாகனங்களில் சேமித்துவிட்டு, மீண்டும் மீண்டும் வரிசையில் நின்று எரிபொருளைப் பெற்று பதுக்கி வருவதாகத் தெரியவருகிறது.
இதன் காரணமாக அவசரத் தேவைகளுக்காகச் செல்லும் நோயாளர்கள். நேரத்திற்குப் பணிக்குச் செல்ல வேண்டிய அரச உத்தியோகத்தர்கள்.அன்றாட வாழ்வாதாரத்திற்காகப் பயணிக்கும் தொழிலாளர்கள் எரிபொருளைப்பெற்றுக்கொள்வதில் பெரும் சிரமங்களை எதிர்நோக்கிவருகின்றனர்.
எரிபொருள் பதுக்கல் மற்றும் வதந்திகளுக்கு எதிராக பொலிஸார் கண்காணிப்பைத் தீவிரப்படுத்தியுள்ளதாகக் கூறினாலும், சில பகுதிகளில் சட்டங்கள் மீறப்படுவது குறித்து உரிய அதிகாரிகள் உடனடியாகக் கவனம் செலுத்த வேண்டும் எனப் பொதுமக்கள் கோரிக்கை விடுத்துள்ளனர்.
