வலிந்து காணாமல் ஆக்கப்பட்டோர் தினத்தை முன்னிட்டு, “நீதிக்கான நீள்பயணம்” எனும் தொனிப்பொருளில் சர்வதேச மாநாடு இன்று (30) யாழ்ப்பாணத்தில் நடைபெற்றது. வடக்கு – கிழக்கு வலிந்து காணாமல் ஆக்கப்பட்டவர்களின் உறவினர்களின் சங்கத்தின் ஏற்பாட்டில் நடைபெற்ற இம்மாநாட்டை முன்னிட்டு, யாழ்ப்பாண நகரில் கவனயீர்ப்பு பேரணியும் இடம்பெற்றது.
பேரணியின் முன்னிலையில், காணாமல் ஆக்கப்பட்டவர்களின் புகைப்படங்கள் பொறிக்கப்பட்ட விசேட வாகனம் சென்றதுடன், காணாமல் ஆக்கப்பட்டோரின் உறவினர்கள் தமது அன்புக்குரியவர்களின் புகைப்படங்களை ஏந்தியவாறு பேரணியில் கலந்துகொண்டனர்.பின்னர் யாழ்ப்பாணம் தந்தை செல்வா கலையரங்கில் சர்வதேச மாநாடு நடைபெற்றது.
இந்நிகழ்வில் மட்டக்களப்பு மாவட்ட நாடாளுமன்ற உறுப்பினர்களான ஞா. ஸ்ரீநேசன், வைத்தியர் இ. ஸ்ரீநாத், யாழ்ப்பாணம் மாவட்ட நாடாளுமன்ற உறுப்பினர் சி. சிறிதரன், நாடாளுமன்ற உறுப்பினர் ரவிகரன், மட்டக்களப்பு மண்முனை மேற்கு பிரதேச சபை தவிசாளர் த. கோபாலப்பிள்ளை, தமிழ்த்தேசிய கட்சிகளின் தலைவர்கள் உள்ளிட்ட பலர் கலந்துகொண்டனர்.
இதன்போது காணாமல் ஆக்கப்பட்டவர்களின் உறவினர்கள் உள்ளிட்ட பலர் கலந்துகொண்டு, தமது அன்புக்குரியவர்களுக்கு நீதி கிடைக்க வேண்டும் என வலியுறுத்தினர்.
மேலும், காணாமல் ஆக்கப்பட்டவர்கள் தொடர்பான உண்மைகள் முழுமையாக வெளிக்கொணரப்பட்டு, அவர்களின் நிலை குறித்து தெளிவான பதில் வழங்கப்படுவதுடன், பொறுப்புக்கூறல் உறுதி செய்யப்பட வேண்டும் என்றும் அவர்கள் வலியுறுத்தினர்.
