பயங்கரவா தடைச்சட்டத்தின் நீக்க வலியுறுத்தி முன்னெடுக்கப்பட்டுவரும் கையெழுத்துப்பெறும் போராட்டம் இன்று ஞாயிற்றுக்கிழமை மட்டக்களப்பு,பட்டிப்பளை பிரதேச செயலாளர் பிரிவுக்குட்பட்ட கொக்கட்டிச்சோலையிலும் நடைபெற்றது.
கொக்கட்டிச்சோலை தான்தோன்றீஸ்வரர் ஆலய சந்தியில் இந்த போராட்டம் இன்று முன்னெடுக்கப்பட்டது.
இலங்கை தமிழரசுக்கட்சியின் வாலிப முன்னணியின் ஏற்பாட்டில் முன்னெடுக்கப்பட்டுவரும் இந்த போராட்டத்தின் ஒரு கட்டமாக இந்த போராட்டம் கொக்கட்டிச்சோலையில் முன்னெடுக்கப்பட்டது.
இந்த நிகழ்வில் கொக்கட்டிச்சோலை தான்தோறீஸ்வரர் ஆலயத்தின் பிரதமகுரு சிவஸ்ரீ மு.கு.சச்சிதானந்த குருக்கள்,ஆலய வண்ணக்கர்கள்,நிர்வாகசபை உறுப்பினர்கள்,முன்னாள் பாராளுமன்ற உறுப்பினர்களான பா.அரியநேத்திரன்,ஞா.சிறிநேசன்,மட்டக்களப்பு மாநகரசபையின் முதல்வர் தி.சரவணபவன்,பட்டிப்பளை பிரதேசசபையின் தவிசாளர் நா.புஸ்பலிங்கம், தமிழரசுக்கட்சியின் வாலிப முன்னணியின் வடகிழக்கு மாகாண தலைவர் கி.சேயோன்,மட்டக்களப்பு மாவட்ட தலைவர் திபாகரன் உட்பட பலர் கலந்துகொண்டனர்.
இதன்போது கொக்கட்டிச்சோலை பகுதியில் கையெழுத்திடும்போராட்டத்தில் பெருமளவானோர் கலந்துகொண்டு தங்களது கையெழுத்துகளையிட்டு ஆதரவு வழங்கியதை காணமுடிந்தது.
இதன்போது கருத்துதெரிவித்த பிரதமகுருக்கள்,
சர்வதேச ரீதியில் அனைவராலும் வியக்கத்தக்க வகையில் தமிழ் மக்களின் உரிமையினைக்கேட்டு போராடிக்கொண்டிருந்த போராளிகளை பயங்கரவாதிகள் என்று பெயரை சூட்டிக்கொண்டு பயங்கரவாத தடைச்சட்டத்தினை இலங்கை அரசாங்கம் கொண்டுவந்து பல அட்டூழியங்களை செய்தது.
குறிப்பாக தமிழ் பேசும் மக்களை கொடூரமான முறையில் நடாத்தி இறுதியாக போராட்டத்தில் ஈடுபட்டிருந்த போராளிகளை அழித்துஒழித்துவிட்டதாக கூறிக்கொண்டு அந்த பயங்கரவாத தடைச்சட்டத்தினை இன்றும் வைத்துக்கொண்டிருப்பதானது இந்த அரசாங்கத்தினது கேலிகூத்தான செயற்பாடாகவேயிருக்கின்றது.
எனவே சர்வதேச ரீதியில் உள்ள நியாயவாதிகள் இந்த பயங்கரவாத தடைச்சட்டத்தினை இலங்கையிலிருந்து நீக்கி,தமிழ் மக்களுக்கான விடிவினை ஏற்படுத்தவேண்டும்.
.jpeg)
